ទិវាមហោស្រពវប្បធម៌ កីឡានិងទេសចរណ៍បណ្តាជនជាតិតំបន់ភាគឦសានលើកទី ១១ ឆ្នាំ ២០២៤ រៀបចំឡើងដោយខេត្ត ឡាងសឺន ធ្វើជាម្ចាស់ផ្ទះ ប្រព្រឹត្តឡើងចាប់ពីថ្ងៃទី ០២ ដល់ថ្ងៃទី ០៤ ខែ វិច្ឆិកា ដោយមានការចូលរួមនៃខេត្តទាំង ៨ គឺ៖ ហាយ៉ាង បាក់យ៉ាង បាក់កាន ត្វៀនក្វាង កាវបាំង ថាយង្វៀន វិញភុក និង ឡាងសឺន។
អញ្ជើញថ្លែងសុន្ទរកថាក្នុងពិធីបើកទិវាមហោស្រព រដ្ឋមន្ត្រីក្រសួង វប្បធម៌ កីឡានិងទេសចរណ៍លោក ង្វៀន វ៉ាន់ហ៊ុង សង្កត់ធ្ងន់ថា ព្រឹត្តិការណ៍មានគោលបំណងលើកតម្កើងតម្លៃវប្បធម៌ប្រពៃណីដ៏ល្អប្រពៃរបស់បណ្តាជនជាតិតំបន់ភាគឦសាន ក្នុងខឿនវប្បធម៌ឯកភាព សម្បូណ៌បែបរបស់សហគមន៍ជនជាតិ វៀតណាម ទាំង ៥៤។ នេះជាកន្លែងមូលមីជនជាតិជាច្រើនដោយមានឃ្លាំងវប្បធម៌ដ៏បរិបូណ៌ សម្បូរបែប ផ្សារភ្ជាប់ជាមួយនឹងដំណើរការតស៊ូប្រយុទ្ធកសាង រក្សាការពារប្រទេសជាតិដ៏អង់អាចក្លាហានរបស់ជាតិយើង។
ក្រោមប្រធានបទ "វប្បធម៌តំបន់ភាគឦសាន - ប្រកបដោយអត្តសញ្ញាណ សមាហរណកម្ម និងឈោងឈានទៅឆ្ងាយ" ទិវាមហោស្រពត្រូវបានប្រារព្ធឡើងក្នុងគោលបំណងពង្រីកស្មារតី សាមគ្គីបណ្តាជនជាតិ សាយភាយសេចក្តីស្រលាញ់ គាំទ្រ លើកទឹកចិត្តស្មារតីប្រជាជនពុះពារឆ្លងកាត់រាល់ក្ដីលំបាកលំបិនជាមួយគ្នា ប្រញាប់ប្រញាល់ជម្នះផលវិបាកធ្ងន់ធ្ងរនៃគ្រោះធម្មជាតិ ឆាប់លំនឹងជីវភាព ជំរុញសេដ្ឋកិច្ច - សង្គមតំបន់ភាគឦសានអភិវឌ្ឍឆាប់រហ័សនិងចីរភាព។
ក្នុងក្របខ័ណ្ឌនៃទិវាមហោស្រពបានប្រព្រឹត្តឡើងបណ្តាសកម្មភាពដ៏វិសេសវិសាលដូចជា៖ ការសម្តែង ឧទ្ទេសនាមឈុតឆាកដកចេញពីទិវាមហោស្រព ពិធីកិច្ចប្រជុំជីវភាពវប្បធម៌ប្រពៃណី ជនជាតិ លម្ហដាក់តាំងបង្ហាញ ឧទ្ទេសនាម ផ្សព្វផ្សាយផលិតផលវប្បធម៌ ប្រពៃណីរបស់មូលដ្ឋាន សិក្ខាសាលាវិទ្យាសាស្ត្រ "ទេសចរណ៍វប្បធម៌តំបន់ភាគឦសាន - ចាប់ផ្ដើមនិងអភិវឌ្ឍ" មហោស្រពសិល្បៈមហាជននិងបង្ហាញម៉ូដសម្លៀកបំពាក់បណ្តាជនជាតិតំបន់ភាគឦសាន ប្រឡងប្រជែងបណ្តាវិញ្ញាសាកីឡាជនជាតិ ប្រឡងសម្ដែងបំណិនមគ្គុទ្ទេសក៍ទេសចរណ៍ ដាក់តាំងពិព័រណ៌ "លក្ខណៈវប្បធម៌ដ៏ពិសេសដាច់ដោយឡែកបណ្តាជនជាតិតំបន់ភាគឦសាន ក្នុងសហគមន៍វប្បធម៌បណ្តាជនជាតិ វៀតណាម"។
ជាពិសេស ទិវាមហោស្រពក៏ជាឱកាសសម្រាប់សិប្បករសិប្បការិនី តារាសម្ដែង កីឡាករកីឡាការិនីមហាជនបណ្តាជនជាតិចូលរួមផ្លាស់ប្តូរ ផ្តោះប្តូរបទពិសោធន៍ លើកកម្ពស់ការយល់ដឹង ទំនួលខុសត្រូវក្នុងការកសាងនិងអភិវឌ្ឍវប្បធម៌ប្រជាជន វៀតណាម ឆ្លើយតបតម្រូវការអភិវឌ្ឍប្រទេសជាតិប្រកបដោយចីរភាព៕
អត្ថបទ៖ អាញ់ទន់
រូបថត៖ អាញ់ទន់ - ក្វាងយុយ - ថាញ់ទុង
បញ្ចូលទិន្នន័យ៖ លឺ ធីអៀនថាញ់
