ការកសាងជនបទថ្មីនៅឃុំទាំងឡាយតាមតំបន់ទីជម្រាលមាត់សមុទ្រនៅខេត្ត កាម៉ៅ

ដោយមានការចូលរួមយ៉ាងសកម្មពីសំណាក់ប្រព័ន្ធនយោបាយទាំងមូលនិងការរួមកម្លាំងកាយកម្លាំងចិត្តរបស់ប្រជាជននោះ ក្រោយរយៈពេលជាង ១០ ឆ្នាំដាក់ដំណើរការអនុវត្តកម្មវិធីគោលដៅជាតិស្ដីអំពីកសាងជនបទថ្មី មុខមាត់ជនបទនៅលើភូមិសាស្ត្រខេត្ត កាម៉ៅ បានមានការប្រែមុខមាត់ថ្មីជាច្រើន។

ឃុំ ខាញ់ប៊ិញតីបាក់ ស្រុក ត្រឹន វ៉ាន់ធើយ (ខេត្ត កាម៉ៅ) បានដាក់ដំណើរការអនុវត្តយ៉ាងសកម្មនូវទម្រង់រូបភាពជួយឧបត្ថម្ភប្រជាជនផ្លាស់ប្តូរទម្លាប់ផលិតកម្មផ្សេងៗ បង្កើនប្រាក់ចំណូលសម្រាប់ប្រជាជនពីមួយជំហានទៅមួយជំហាន

ជាពិសេសគឺនៅតាមបណ្ដាឃុំនៅតំបន់ទីជម្រាលមាត់សមុទ្រ កន្លែងដែលត្រូវបានគេស្គាល់ថាមានកម្រិតជីវភាពរស់នៅលំបាកលំបិននោះ នាពេលបច្ចុប្បន្ននេះ ជីវភាពរស់នៅទាំងសម្ភារៈ ទាំងស្មារតីរបស់ប្រជាជនកំពុងត្រូវបានបង្កើនឡើងបន្តិចម្តងៗ ហើយ...

ផ្តើមពីឃុំមួយដែលលំបាកលំបិនខ្លាំងនៅតំបន់ទីជម្រាលមាត់សមុទ្រនិងកោះសមុទ្រ ម្ដងម្កាលធ្លាប់មានអត្រាប្រជាជនចំណាកស្រុកខ្ពស់ជាប់លំដាប់ទី ១ ទី ២ នៃខេត្ត កាម៉ៅ នោះ ក្នុងប៉ុន្មានថ្ងៃដើមឆ្នាំ ២០២១ នេះ ក្តីរីករាយត្រេកអររបស់ប្រជាជននៅឃុំ ខាញ់ប៊ិញតីបាក់ ស្រុក ត្រឹន វ៉ាន់ ធើយ (ខេត្ត កាម៉ៅ) ត្រូវបានគុណឡើងទ្វេដងខណៈពេលដែលឃុំ បានទទួលស្គាល់សម្រេចស្តង់ដារជនបទថ្មី។

យោងតាមលោក ប៊ូយ ជីង៉ាន អនុប្រធានគណៈកម្មាធិការប្រជាជនឃុំ ខាញ់ ប៊ិញតីបាក់ អាស្រ័យដោយមានការជួយឧបត្ថម្ភពីសំណាក់គ្រប់លំដាប់ថ្នាក់និងការខិតខំប្រឹងប្រែងប្តេជ្ញាចិត្តរបស់ប្រជាជន កម្មវិធីកសាងជនបទថ្មីនៅលើភូមិសាស្ត្រឃុំបានបោះជំហាន លោតផ្លោះប្រកបដោយលក្ខណៈទម្លុះទម្លាយភាពទ័លច្រក គឺមិនត្រឹមតែសម្រេចបានលក្ខណៈ វិនិច្ឆ័យជនបទថ្មីទាំង ១៩/១៩ ប៉ុណ្ណោះទេ ថែមទាំងមានលក្ខណៈ វិនិច្ឆ័យជាច្រើនទៀតបានសម្រេចក្នុងកម្រិតខ្ពស់។

នៅលើភូមិសាស្ត្រឃុំ ខាញ់ប៊ិញតីបាក់ ស្រុក ត្រឹន វ៉ាន់ធើយ (ខេត្ត កាម៉ៅ) មានផ្លូវថ្នល់ជាង ៩០% ត្រូវបានប្រជាជនគាំទ្រយ៉ាងសកម្មក្នុងការដាំផ្កានិងសង់របង

ទូទាំងឃុំមានសាលារៀនចំនួន ៤/៥ សម្រេចស្តង់ដារជាតិ ចំណូលជាមធ្យមក្នុងមនុស្សម្នាក់សម្រេចបានជាង ៥០ លានដុងក្នុងមួយឆ្នាំ។

នាពេលបច្ចុប្បន្ននេះ ឃុំនៅសល់ក្រុមគ្រួសារក្រីក្រតែ ៨៣ គ្រួប៉ុណ្ណោះ ស្មើនឹងអត្រា ២,២៦% និងក្រុមគ្រួសារជិតខ្សែបន្ទាត់នៃភាពក្រីក្រចំនួន ៣៩ ស្មើនឹងអត្រាជាង ១% នៃចំនួនប្រជាជន…។

ជាពិសេស ឃុំទាំងមូលលែងមានក្រុមគ្រួសាររស់នៅក្នុងលំនៅឋានបណ្តោះអាសន្ន ធ្លុះធ្លាយទ្រុឌទ្រោមទៀតឡើយ អត្រាប្រជាជនចូលរួមធានារ៉ាប់រងសុខភាពសម្រេចបាន ១០០% ជីវភាពរស់នៅនៃប្រជាជនត្រូវបានបង្កើនឡើងឥតឈប់ឈរ។

ទម្រង់រូបភាពចិញ្ចឹមត្រីកន្ធររួមចំណែកជួយអោយប្រជាជននៅឃុំ ខាញ់ប៊ិញតីបាក់ ស្រុក ត្រឹន វ៉ាន់ធើយ (ខេត្ត កាម៉ៅ) ឈោងឈានឡើងរួចផុតពីភាពក្រីក្រ

ក៏ជាឃុំនៅតំបន់ទីជម្រាលមាត់សមុទ្រដែរ ចំណូលចម្បងៗ របស់ប្រជាជននៅឃុំ តឹនធន់ ស្រុក ដឹមយើយ (ខេត្ត កាម៉ៅ) ភាគច្រើនគឺមកពីវារីវប្បកម្ម នេសាទសមុទ្រ ហត្ថកម្មខ្នាតតូច សេវាកម្មនិងការជួញដូរតូចតាច។

ទោះបីជាដំណើការទៅកាន់គោលដៅកសាងជនបទថ្មីនៅយូរឆ្ងាយយ៉ាង ណាក៏ដោយ ក៏ប៉ុន្តែមុខមាត់ជនបទនៅទីនេះបានមានការផ្លាស់ប្តូរ លោតផ្លោះច្រើនបែបយ៉ាងហើយ។

សេដ្ឋកិច្ចសមុទ្រគឺជាផ្នែកសេដ្ឋកិច្ចមុខព្រួញ ជួយបណ្ដាឃុំនៅតំបន់ទីជម្រាលមាត់សមុទ្រនៃខេត្ត កាម៉ៅ អភិវឌ្ឍសេដ្ឋកិច្ច អាចសម្រេចគោលដៅជនបទថ្មីជាស្ថាពរក្នុងពេលឆាប់ៗ ខាងមុខ

លោក ត្រឹន វ៉ាន់ទ្រៀវ ប្រធានគណៈកម្មាធិការប្រជាជនឃុំ តឹនធន់ បានមានប្រសាសន៍ថា៖ "ដោយបានកំណត់ថាក្ដីលំបាកនិងចំណុចរាំងស្ទះធំបំផុតរបស់ឃុំគឺវិស័យហេដ្ឋារចនាសម្ព័ន្ធផ្លូវគមនាគមន៍បានជាមូលដ្ឋានបានផ្ដោតប្រភពធនធានជាច្រើនទៅលើការអភិវឌ្ឍបណ្តាញផ្លូវគមនាគមន៍ជនបទ។ គិតដោយឡែកតែឆ្នាំ ២០២០ ឃុំបានសាងសង់សមេ្រចរួចរាល់ផ្លូវគមនាគមន៍ចំនួន ២២ កន្លែងដោយមានប្រវែង ២១ គីឡូម៉ែត្រ។ រហូតមកទល់សព្វថ្ងៃនេះ ទូទាំង ឃុំមានផ្លូវជនបទមាំទាំប្រវែងជាង ៩៩ គីឡូម៉ែត្រ។ ការអភិវឌ្ឍផ្លូវគមនាគមន៍បានរួមចំណែកកែលម្អជីវភាពប្រជាជនក្នុងឃុំ ប្រាក់ចំណូលជាមធ្យមក្នុងមនុស្សម្នាក់សម្រេចបានជាង ៤០ លានដុងក្នុងមួយឆ្នាំ អត្រាក្រុមគ្រួសារក្រីក្រថយចុះនៅតែ ៣,៩%។ នេះគឺជាបុរេលក្ខណៈ វិនិច្ឆ័យសម្រាប់ឃុំតំបន់ទីជម្រាលមាត់សមុទ្រ តឹនធន់ សម្រេចគោលដៅកសាងជនបទថ្មីជាស្ថាពរ។ គិតមកដល់ពេលបច្ចុប្បន្ននេះ ឃុំ តឹនធន់ សម្រេចបានលក្ខណៈវិនិច្ឆ័យជនបទថ្មីចំនួន ៨/១៨ ហើយ"។

មុខមាត់ជនបទថ្មីតាមបណ្ដាឃុំនៅតំបន់ទីជម្រាលមាត់សមុទ្រខេត្ត កាម៉ៅ មានការផ្លាស់ប្តូរពីមួយថ្ងៃទៅមួយថ្ងៃ

យោងតាមសេចក្តីសម្រេចលេខ 1722/QĐ-TTg ចុះថ្ងៃទី ២ ខែ កញ្ញា ឆ្នាំ ២០១៦ របស់នាយករដ្ឋមន្រ្តីនៃរដ្ឋាភិបាល ខេត្ត កាម៉ៅ មានឃុំលំបាកលំបិនខ្លាំងដែលស្ថិតនៅតំបន់ទីជម្រាលមាត់សមុទ្រនិងកោះសមុទ្រចំនួន ១១។

មុខរបរផលិតអំបិលផ្ដល់ចំណូលស្ថិរភាពអោយប្រជាជននៅឃុំ តឹនធន់ ស្រុក ដឹមយើយ (ខេត្ត កាម៉ៅ)

លើភាពជាក់ស្តែង គោលដៅ ភារកិច្ចក្នុងពេលខាងមុខរបស់មូលដ្ឋានទាំងនេះ ទោះជាមានភាពខុសៗ គ្នាក៏ដោយ ក៏ប៉ុន្តែនៅតែជាបន្ទុកដ៏ធ្ងន់ធ្ងរដែរ។

គោលដៅកសាងឲ្យឃុំសម្រេចស្តង់ដារជនបទថី្ម មិនមែនជាទិសដៅចុងក្រោយបំផុតដែលឃុំលំបាកលំបិនខ្លាំងតំបន់ទីជម្រាលមាត់សមុទ្រនិងកោះសមុទ្រដូចជា ខាញ់ប៊ិញតីបាក់ ឬ តឹនធន់ ឆ្ពោះទៅរកទេ។

ទម្រង់រូបភាពដាំដំណាំលើដីស្រែជួយប្រជាកសិករនៅតំបន់ទីជម្រាលមាត់សមុទ្រខេត្ត កាម៉ៅ បង្កើនប្រាក់ចំណូល

មូលដ្ឋានទាំងនេះកំពុងឱបក្រសោបបំណងប្រាថ្នាធំជាងទៀតគឺកសាងតំបន់ជនបទស៊ីវិល័យ រីកចម្រើនគ្រប់ជ្រុងជ្រោយនោះឯង…៕

អត្ថបទ៖ ហ៊ិ្វញអាញ់
រូបថត៖ ហ៊ិ្វញអាញ់ - ហ៊ិ្វញឡឹម
បញ្ចូលទិន្នន័យពីសារព័ត៌មានបោះពុម្ពលេខចេញផ្សាយខែ កញ្ញា ឆ្នាំ ២០២១ ដោយ៖  យ័ញលើយ