ជនជាតិ កឺទូ អំណរ ហ្កឿល ថ្មី

ខាញ់ង្វៀន

30/01/2025 08:57

ពិធីបុណ្យភូមិអំណរ ហ្កឿល ថ្មីរបស់បងប្អូនជនជាតិ កឺទូ ភូមិ អារ៉

ចំពោះបងប្អូនជនជាតិ កឺទូ នៅភូមិ អារ៉ ឃុំ ឡាំង ស្រុក តីយ៉ាង (ខេត្ត ក្វាងណាម) ហ្កឿល ជាលម្ហប្រជុំជីវភាពរួម មានអត្ថន័យសំខាន់ក្នុងជីវភាពវប្បធម៌ខាងព្រលឹងវិញ្ញាណ។ ដើម្បីអបអរសាទរសំណង់ដ៏មហោឡារិកនេះ ជាធម្មតាបងប្អូនជនជាតិ កឺទូ រៀបចំពិធីអំណរ ហ្កឿល ថ្មី រួមចំណែកអភិរក្សលក្ខណៈវប្បធម៌សហគមន៍ដ៏ល្អប្រពៃ។

យោងតាមលោក អាឡាំង មែន អនុប្រធានគណៈកម្មាធិការប្រជាជនឃុំ ឡាំង អំណរ ហ្កឿល ថ្មីគឺជាពិធីបុណ្យមួយក្នុងចំណោមពិធីបុណ្យដ៏សំខាន់របស់បងប្អូនជនជាតិ កឺទូ បំណងសម្តែងការដឹងគុណ លើកទឹកចិត្តដល់អ្នកមានគុណបំណាច់រួមវិភាគទានក្នុងការស្តារ ហ្កឿល ឡើងវិញ រួមចំណែកអភិរក្សអត្តសញ្ញាណវប្បធម៌សហគមន៍។ នេះក៏ជាឱកាសដើម្បីបងប្អូនជនជាតិ កឺទូ រឹតបន្តឹងសាមគ្គីភាព ចែករំលែកបទពិសោធន៍ក្នុងពលកម្ម ផលិតកម្ម អភិវឌ្ឍសេដ្ឋកិច្ច អភិរក្សអត្តសញ្ញាណវប្បធម៌ប្រពៃណី។

*កំលោះៗ កឺទូ ធ្វើពិធីកិច្ចលាបំណន់ ព្រះអាទិទេព*

ព្រលឹមស្រាងៗ សត្វក្របីត្រូវបានព្រឹទ្ធាចារ្យភូមិដឹកមកចងនឹងដើម នេវ។ ចំពោះមុខការអញ្ជើញជាសក្សីរបស់អ្នកភូមិនិងភ្ញៀវទេសចរ សំឡេងឃ្មោះ សូរស្គរបន្លឺឡើង កំលោះក្រមុំ កឺទូ ក្នុងឈុតសម្លៀកបំពាក់ប្រពៃណីរាំចង្វាក់របាំ ទុងទុង - យ៉ាយ៉ា ជាមួយគ្នាតាមរង្វង់មូលមួយនៅខាងមុខ ហ្កឿល។ ពួកគាត់សប្បាយរីករាយបង្ហាញឡើងវិញពិធីកិច្ច "ហូបក្របី" ក្នុងពិធីបុណ្យអំណរសំណង់ ហ្កឿល ថ្មី។

ការប្រលងទាញព្រ័ត្របុរសស្ត្រីបន្សល់ទុកចំណាប់អារម្មណ៍ជាច្រើនក្នុងថ្ងៃបុណ្យ

លោក ពើឡង ព្លេញ អនុប្រធានការិយាល័យវប្បធម៌ - ព័ត៌មានស្រុក តីយ៉ាង បានឲ្យដឹងថា មុនពេលប្រព្រឹត្តឡើងពិធីបុណ្យ ព្រឹទ្ធាចារ្យភូមិទាំងឡាយនឹងធ្វើពិធីដោតដំឡើង នេវ នៅខាងមុខ ហ្កឿល កន្លែងបងប្អូនជនជាតិចងក្របី រៀបចំអំណរស្នាដៃ។

ការលេងល្បែងបញ្ចប់រួចរាល់ រង្វាន់ "ផលិតផលដាំដុះខ្លួនឯង" ត្រូវបានផ្ញើជូន កាន់តែដិតដាមទៅដោយសាមគ្គីភាពថែមទៀត

ក្រោយពេលបញ្ចប់ពិធីកិច្ច សត្វក្របីត្រូវបានយកទៅពិឃាតយកសាច់ទទួលភ្ញៀវ។ ពិធីកិច្ចនេះជាពិធីសំខាន់ មួយក្នុងចំណោមពិធីដ៏សំខាន់ទាំងឡាយហើយដ៏វិសេសវិសាលនៃទំនៀមទម្លាប់ហូបក្របី អំណរស្នាដៃថ្វាយដំណឹងដល់ យ៉ាង មានអត្ថន័យថ្វាយដំណឹងចំពោះព្រះអាទិទេពអំពីការបញ្ចប់ជាស្ថាពរដំណាក់កាលជួសជុល ហ្កឿល តាមបំណងប្រាថ្នារបស់សហគមន៍ភូមិ។

*ចង្វាក់ឃ្មោះបន្លឺលាន់ឮឡើងសម្របខ្លួនទៅតាមចង្វាក់រាំ ទុងទុង - យ៉ាយ៉ា*

ក្នុងសំឡេងស្គរ ឃ្មោះគឹកកង លម្ហ ហ្កឿល ថ្មីបានបង្កើតចំណាប់អារម្មណ៍ល្អចំពោះភ្ញៀវទេសចរនិងអ្នកស្រុក។ មនុស្សជាច្រើនក៏បានផ្អាកការងារគ្រួសារជាបណ្ដោះអាសន្ន ឡើងលើភ្នំទៅចូលរួមនិងសប្បាយរីករាយជាមួយនឹងសហគមន៍ កឺទូ ភូមិ អារ៉ ទៀតផង៕

អត្ថបទនិងរូបថត៖ ខាញ់ង្វៀន
ប្រែសម្រួលនិងបញ្ចូលទិន្នន័យ៖ អៀនថាញ់

(កាសែតរូបភាពជនជាតិនិងតំបន់ភ្នំ)